சப்பாத்திக்கு சுரைக்காயை வெச்சு இப்படி மசாலா பண்ணுங்க… சூப்பரா இருக்கும்…

இன்று இரவு உங்கள் வீட்டில் சப்பாத்தி செய்யப் போகிறீர்களா? அந்த சப்பாத்திக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? உங்கள் வீட்டில் சுரைக்காய் உள்ளதா? அப்படியானால் அந்த சுரைக்காயைக் கொண்டு வேர்க்கடலை மசாலா செய்யுங்கள்.

இந்த சுரைக்காய் வேர்க்கடலை மசாலா சப்பாத்திக்கு மட்டுமின்றி, சாதத்திற்கும் நன்றாக இருக்கும். மேலும் இது அனைவரும் விரும்பி சாப்பிடக்கூடியவாறு சுவையாகவும் இருக்கும். அதோடு, வேலை முடிந்து வீட்டிற்கு வந்ததும் வேகமாகவும் இது செய்யக்கூடியவாறு இருக்கும்.

உங்களுக்கு சுரைக்காய் வேர்க்கடலை மசாலாவை எப்படி செய்வதென்று தெரிந்து கொள்ள வேண்டுமா? கீழே சுரைக்காய் வேர்க்கடலை மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வேர்க்கடலை – 1/2 கப்

* பூண்டு – 6 பல்

பிற பொருட்கள்…

* சுரைக்காய் – 1 (தோல் நீக்கி சிறு துண்டுகளாக்கப்பட்டது)

* கடலை எண்ணெய் – 2 டேபிள் ஸ்பூன்

* கடுகு – 1/4 டீஸ்பூன்

* சீரகம் – 1/4 டீஸ்பூன்

* வரமிளகாய் – 2

* கறிவேப்பிலை – சிறிது

* பெருங்காயத் தூள் – 1 சிட்டிகை

* சின்ன வெங்காயம் – 1 கப் (பொடியாக நறுக்கியது)

* தக்காளி – 2 (பொடியாக நறுக்கியது)

* உப்பு – 1 டீஸ்பூன்

* பச்சை மிளகாய் – 2

* மஞ்சள் தூள் – 1/2 டீஸ்பூன்

* மிளகாய் தூள் – 1 டீஸ்பூன்

* மல்லித் தூள் – 2 டீஸ்பூன்

* கொத்தமல்லி – சிறிது

செய்முறை:

* முதலில் ஒரு வாணலியை அடுப்பில் வைத்து, அதில் வேர்க்கடலை மற்றும் பூண்டு சேர்த்து நன்கு பொன்னிறமாக வறுத்து இறக்கி குளிர வைக்க வேண்டும்.

* பின் அதை மிக்சர் ஜாரில் போட்டு, நன்கு அரைத்து தனியாக வைத்துக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, சீரகம், வரமிளகாய், கறிவேப்பிலை சேர்த்து, பெருங்காயத் தூளையும் சேர்த்து தாளிக்க வேண்டும்.

* பின் அதில் வெங்காயத்தை சேர்த்து 2 நிமிடம் நன்கு வதக்க வேண்டும்.

* அடுத்து தக்காளியை சேர்த்து, சிறிது உப்பு தூவி, பச்சை மிளகாயையும் சேர்த்து, தக்காளி நன்கு மென்மையாகும் வரை வதக்க வேண்டும்.

* பின்பு மிளகாய் தூள், மஞ்சள் தூள் மற்றும் மல்லித் தூள் சேர்த்து கிளறி, சுரைக்காயையும் சேர்த்து பிரட்டி விட வேண்டும்.

* பிறகு 1/2 கப் நீரை ஊற்றி, சுவைக்கேற்ப உப்பு சேர்த்து கிளறி, வாணலியை மூடி, குறைவான தீயில் வைத்து, 10-12 நிமிடம் வேக வைக்க வேண்டும்.

* சுரைக்காய் நன்கு வெந்ததும், அதில் அரைத்து வைத்துள்ள வேர்க்கடலை பொடியை சேர்த்து கிளறி, 2 நிமிடம் கிளறி இறக்கி, கொத்தமல்லியைத் தூவினால், சுவையான சுரைக்காய் வேர்க்கடலை மசாலா தயார்.