வேலை கையிலெடுத்த சிவகார்த்திகேயன்…

சிவகார்த்திகேயனின் 26 ஆவது படத்தை கமலின் ராஜ்கமல் ஃபிலிம்ஸ் தயாரிக்க இருப்பதாக அதிகாரப்பூர்வ தகவல் வெளியாகியுள்ளது

அமரன் படத்தைத் தொடர்ந்து கமல் தயாரிப்பில் நடிக்க இருக்கும் இப்படத்தின் ஃபர்ஸ்ட் லுக் நாளை வெளியாக இருக்கிறது.

பராசக்தி திரைப்படத்தைத் தொடர்ந்து சிவகார்த்திகேயனின் அடுத்தபடத்தை வெங்கட் பிரபு இயக்குவார் என்று பரவலாக எதிர்பார்ப்புகள் இருந்தன. இதனிடையில் சிவகுமார்  முருகேசன் தயாரிப்பில் ஒரு குட்டி கிராமத்து பின்னணியை கொண்ட கமர்சியல் படத்தில் சிவா நடிக்க இருப்பதாக தகவல்கள் வெளியாகின. சிவகுமார் முருகேஷ் இயக்கியுள்ள தாய்கிழவி திரைப்படம் படத்தை சிவகார்த்திகேயன் தயாரித்துள்ளார். இந்த படம் பிப்ரவரி 27 ஆம் தேதி திரையரங்குகளில் வெளியாக இருக்கிறது. தற்போது சிவகார்த்திகேயன் 26 ஆவது படத்தை ராஜ்கமல் ஃபிலிம்ஸ் தயாரிக்க இருக்கும் அதிகாரப்பூர்வ அப்டேட் வெளியாகியுள்ளது . நாளை இப்படத்தின் ஃபர்ஸ்ட் லுக் வெளியாக இருக்கிறது

மீண்டும் கமல் தயாரிப்பில்

ராஜ்குமார் பெரியசாமி இயக்கத்தில் சிவகார்த்திகேயன் நடித்த அமரன் திரைப்படத்தை ராஜ்கமல் ஃபிலிம்ஸ் தயாரித்தது. வீர மரணமடைந்த மேஜர் முகுந்தின் வாழ்க்கையை தழுவி உருவான அமரன் திரைப்படம் உலகளவில் 300 கோடிக்கும் மேல் வசூல் செய்தது.  இப்படம் ராஜ்கமல் நிறுவனத்திற்கு மிகப்பெரிய லாபம் ஈட்டி தந்த படமாக அமைந்தது. அமரன் படத்தைத் தொடர்ந்து சிவகார்த்திகேயன் நடித்து வெளியான மதராஸி மற்றும் பராசக்தி திரைப்படங்கள் எதிர்பார்த்த வசூல் வெற்றியை தரவில்லை. அதேபோல் ராஜ்கமல் இணைந்து தயாரித்த தக் லைஃப் திரைப்படம் வசூல் ரீதியாக தோல்வியை சந்தித்தது.

இதனைத் தொடர்ந்து தற்போது இரண்டாவது முறையாக கமல் தயாரிப்பில் எஸ்.கே நடிக்க இருப்பது ரசிகர்களின் உற்சாகத்தை கிளப்பியுள்ளது. இப்படம் தொடர்பாக படக்குழு வெளியிட்டுள்ள போஸ்டரில் தமிழ் கடவுள் முருகனின் வேலை கையில் ஏந்தியபடி ஒருத்தர் நிற்கிறார். அண்மை காலங்களில் வேலை மையப்படுத்தி பல அரசியல் நிகழ்ந்து வரும் நிலையில் இந்த போஸ்டர் வெளியாகியுள்ளது பேசுபொருளாகியுள்ளது .