Reliance Starlink: தொலைதொடர்பு சேவை பிரிவில் எலான் மஸ்கின் ஸ்டார்லிங்க் உள்ளிட்ட எந்த நிறுவனம் வேண்டுமானாலும் போட்டிக்கு வரலாம் என, ரிலையன்ஸ் குழும தலைவர் அம்பானி தெரிவித்துள்ளார்.
Reliance Starlink: தொலைதொடர்பு துறைக்கு வரும் நிறுவனங்கள் எதுவானாலும், இந்திய மக்களுக்கு சேவையாற்ற வேண்டும் என ரிலையன்ஸ் குழும தலைவர் முகேஷ் அம்பானி வலியுறுத்தியுள்ளார்.
போட்டிக்கு நாங்கள் தயார் – மஸ்கிற்கு ரிலையன்ஸ் பதில்
இந்திய தொலைதொடர்பு சேவைக்குள் எலான் மஸ்க் தலைமையிலான ஸ்டார்லிங்க் உள்ளிட்ட எந்தவொரு நிறுவனத்தின் போட்டியையும் வரவேற்கிறோம் என, ரிலையன்ஸ் குழுமம் தெரிவித்துள்ளது. அதேநேரம், அனைத்து நிறுவனங்களும் நாட்டின் சட்ட விதிமுறைகளுக்கு உட்பட்டு செயல்பட வேண்டும் எனவும் வலியுறுத்தப்பட்டுள்ளது. ரிலையன்ஸ் குழுமம் மற்றும் இந்திய சந்தை தொடர்பான எலான் மஸ்கின் அண்மை கால கருத்து தொடர்பான இந்த அறிக்கையில், ”வகுக்கப்பட்டுள்ள சட்டவிதிகளுக்குட்பட்டு முன்னெடுக்கப்படும் முதலீடுகள் மற்றும் கண்டுபிடிப்புகள், உள்ளூர் மற்றும் வெளிநாடு என எங்கிருந்து வந்தாலும் நாங்கள் ஆதரிப்போம்” என ரிலையன்ஸ் குழுமம் தெரிவித்துள்ளது.
”இந்தியர்களுக்கு சேவையாற்ற வேண்டும்”
மேலும், “தொலைதொடர்பு துறைக்குள் வரும் ஜியோ உள்ளிட்ட எந்தவொரு நிறுவனமும், நாட்டின் சட்டம் மற்றும் கொள்கைகளை பின்பற்ற இந்திய மக்களுக்கு சேவையாற்றிட வேண்டும். இந்திய அரசு கூறியுள்ளபடி, இந்தியர் அல்லது வெளிநாட்டவர் என எந்தவொரு விண்ணப்பதாரருக்கும் ஒரே மாதிரியான செயல்முறையே பின்பற்றப்படுகிறது. ஜியோவின் சொந்த செயற்கைக்கோள் சேவைகளும் ஒப்புதலுக்காகக் காத்திருக்கின்றன. நாங்கள் போட்டிக்கு ஒருபோதும் அஞ்சியதில்லை. வாடிக்கையாளருக்கு யார் சிறந்த சேவை செய்கிறார்கள் என்பதற்கான உண்மையான சோதனையாகவே அதைக் கருதுகிறோம். ஜியோவே 2016-ல் ஒரு வாடிக்கையாளர் கூட இல்லாமல், இந்தியாவின் நெரிசல் மிகுந்த தொலைத்தொடர்பு சந்தையில் ஒரு புதிய நிறுவனமாக நுழைந்தது. வெறும் பத்து ஆண்டுகளில், 53 கோடிக்கும் அதிகமான வாடிக்கையாளர்களின் நம்பிக்கையைப் பெற்றுள்ளது” என ரிலையன்ஸ் குழுமத்தின் அறிக்கையில் தெரிவிக்கப்பட்டுள்ளது.
5 ஆண்டுகளாக முயற்சிக்கும் ஸ்டார்லிங்க்
எலான் மஸ்க் தலைமையிலான ஸ்டார்லிங்க் நிறுவனம் சர்வதேச அளவில், செயற்கைக்கோள் அடிப்படையிலான இணைய சேவையில் முன்னணியில் இருந்து வருகிறது. இந்திய சந்தையிலும் தனது சேவையை தொடங்க 5 ஆண்டுகளுக்கும் மேலாக முயற்சித்து வருகிறது. முதற்கட்ட அனுமதிகள் கிடைத்த நிலையில் தேவையான உட்கட்டமைப்புகளை ஏற்படுத்திய பிறகும், இறுதிகட்ட பாதுகாப்பு ஒப்புதல் உள்ளிட்டவை மத்திய அரசு சார்பில் இதுவரை அவருக்கு கிடைக்கப்பெறவில்லை. இதனால் உள்ளூர் சந்தையில் தனது வணிக சேவையை தொடங்க முடியாத நிலையில் ஸ்டார்லிங்க் தவித்து வருகிறது.
அம்பானி மீது எலான் மஸ்க் காட்டம்
இந்நிலையில் அண்மையில் சமூக வலைதளத்தில் எலான் மஸ்க் வெளியிட்டு இருந்த ட்விட்டர் பதிவில், “பெயர் குறிப்பிடப்படாத சக்திவாய்ந்த வணிக நலன்கள் ஸ்டார்லிங்க் இந்தியாவில் நுழைவதைத் தடுக்க முயற்சிப்பதாக” குற்றம்சாட்டினார். மற்றொரு பதிவில், “கோடீஸ்வரர் முகேஷ் அம்பானிதான் இந்தியாவின் உண்மையான தலைவரா” என்று நேரடியாக கேள்வி எழுப்பினார். இந்த குற்றச்சாட்டுகளை நிராகைரித்த மத்திய அரசு, :தனது செயற்கைக்கோள் தகவல் தொடர்பு விதிகள் நியாயமானவை மற்றும் பாகுபாடற்றவை” என விளக்கமளித்தது. இந்தியாவின் செயற்கைக்கோள் இணையச் சந்தையில் போட்டி அதிகரித்து வரும் நிலையில், ரிலையன்ஸ் ஜியோ மற்றும் ஏர்டெல் நிறுவனங்கள் சேவைகளைத் தொடங்கத் தயாராகி வருவதால் கடும் போட்டி ஏற்பட்டுள்ளது.
