சென்னை:
மிக்ஜாம் மழை வெள்ளத்தின் போது, வடசென்னையில் கச்சா எண்ணெய் சுத்திகரிப்பு ஆலையிலிருந்து எண்ணெய் கழிவுகள் வெளியேறி கடலில் கலந்த சம்பவம் பெரும் அதிர்ச்சியை ஏற்படுத்தியது. இது தொடர்பாக தாமாக முன்வந்து பசுமை தீர்ப்பாயம் விசாரித்து வரும் நிலையில், இன்று மீண்டும் விசாரணை தொடங்குகிறது.
இந்த வழக்கு கடந்த 9ம் தேதி தென் மண்டல தேசிய பசுமை தீர்ப்பாயத்தின், நீதித்துறை உறுப்பினர் நீதிபதி புஷ்பா சத்தியநாராயணா மற்றும் நிபுணத்துவ உறுப்பினர் சத்யகோபால் கொண்ட அமர்வு முன்பு விசாரணைக்கு வந்தது. அப்போது மாசு கட்டுப்பாட்டு வாரியத்திடம் நீதிபதிகள் சரமாரியான கேள்விகளை எழுப்பியிருந்தனர்.
“எண்ணெய் கசிவு நடந்து 5 நாள் ஆன பின்னரும்கூட எண்ணெய் தடுப்பு மிதவைகள் அமைக்கப்படவில்லை என அரசு கூறும் பதில் திருப்தி அளிக்கவில்லை. இது ஒரு நெருக்கடி நிலை என்பது தெரியவில்லையா?” என்று கேள்வியெழுப்பி, கழிவுகளை உடனடியாக அகற்ற வேண்டும் என்று நீதிபதிகள் உத்தரவிட்டனர். இதனையடுத்து தமிழக அரசு கழிவுகளை அகற்றும் பணியில் தீவிரமாக ஈடுபட்டு தொடங்கியது. ஆனால் இந்த பணியில் மனித உரிமை மீறல் ஏற்பட்டிருப்பதாக பூவுலகின் நண்பர்கள் அமைப்பு குற்றம்சாட்டியது.
இதனையடுத்து கழிவுகளை அகற்றும் பணியில் ஈடுபட்டுள்ளவர்களுக்கு முறையாக பாதுகாப்பு கருவிகள் வழங்கப்பட்டன. கழிவை அகற்ற பூமர் எனும் அதிநவீன இயந்திரமும் ஈடுபடுத்தப்பட்டிருக்கிறது. இந்த கழிவு காரணமாக 5,852 குடும்பங்கள் பாதிக்கப்பட்டிருக்கின்றன. இந்த குடும்பங்களுக்கு வெள்ள நிவாரண நிதியுடன் கூடுதல் நிதியை வழங்கவும் சென்னை மாநகராட்சி தமிழக அரசுக்கு பரிந்துரைத்திருக்கிறது. அதாவது எண்ணெய் கசிவுக்க காரணமாக நிறுவனங்களிடமிருந்து தொகையை பெற்று அதனை பிரித்து கொடுக்க திட்டமிட்டிருக்கிறது.
ஆனால் சிபிசிஎல் நிறுவனம், எண்ணெய் கசிவு குற்றச்சாட்டை ஏற்றுக்கொள்ளவில்லை. இந்நிலையில் இது தொடர்பான வழக்கு விசாரணை இன்று மீண்டும் வருகிறது.
