தஞ்சை: தஞ்சை மாவட்டம் கும்பகோணத்தில் இந்து மக்கள் கட்சி சார்பில் நடைபெற்ற சனாதன பொங்கல் விழாவில் திமுக சட்டமன்ற உறுப்பினர் சாக்கோட்டை அன்பழகன் பங்கேற்றது கட்சியினர் மத்தியில் சலசலப்பை ஏற்படுத்தியுள்ளது.
சனாதன கொள்கைக்கு நேர் எதிர் கொள்கையை கொண்ட இயக்கம் திமுக என்பது ஒரு பக்கம் இருப்பினும், திமுகவை மிக மிக கடுமையான வார்த்தைகளால் விமர்சித்து வரும் அர்ஜுன் சம்பத்தின் இந்து மக்கள் கட்சி நடத்தும் விழாவுக்கு செல்வதா என திமுக எம்.எல்.ஏ. சாக்கோட்டை அன்பழகனுக்கு எதிராக சொந்தக்கட்சியினரே போர்க்கொடி உயர்த்தியுள்ளனர்.
சனாதனத்தை எதிர்த்தும், விமர்சித்தும் அமைச்சர் உதயநிதி ஸ்டாலின், ஆ.ராசா, உள்ளிட்ட திமுக முக்கிய பிரமுகர்கள் பேசி வரும் நிலையில் சனாதன பொங்கல் விழாவில் திமுக சட்டமன்ற உறுப்பினர் சாக்கோட்டை அன்பழகன் கலந்து கொண்டிருக்கிறார்.
முதலமைச்சர் ஸ்டாலினையும், திமுகவையும் மிக கடுமையாக அர்ஜுன் சம்பத் விமர்சித்து வரும் நிலையில் அவரது கட்சி விடுத்த அழைப்பை ஏற்று அறிவாலயத்துக்கு அதிர்ச்சி கொடுத்திருக்கிறார் சாக்கோட்டை அன்பழகன்.
